【魚樂無窮】疫市尋坐貨穩膽（唐牛）
蘋果日報 2020/03/25 20:22
新意網唐牛魚樂無窮
恒指周三重上二萬三關，唐牛指後市要睇實恐慌指數。
還記得周二晚做電視台節目，正值美股開市，道指當時爆升千幾點，第一節例牌評論大市後，主持在廣告時段向我笑說︰「頭先你講到好似唔買唔得咁喎。」是的，今轉睇反彈目標好明確，原因有兩個。第一，儲局出到無限QE必殺技，將市場情緒帶回安樂區，同時將造淡的對手嚇窒，加上拆倉盤完成得七七八八，反彈力度更強；第二，無論美國抑或香港的恐慌指數（即VIX及VHSI）均大幅回落，與之前無論升跌也在高位有明顯分別，亦有利股市回升。
「你上次個欄先講話要保命，咁快又轉軚？」無他，早兩日鮑威爾仲未出超必，睇淡個市好正常，如今有新招穩市，當然有唔同觀點。現時乃非常時期，24小時都可以幾十種變化，墨守成規只會死得更快，靈活轉身才是王道。問我今站睇幾多？反彈0.236倍係23,000點，今日已踢穿，下一站則睇0.382倍，約24,200點，不過一定要睇實恐慌指數，回升嘅話又會無運行，講到尾，齊齊摸着石頭過河吧。
現階段揀股，我會傾向搵一些被無辜殺價的公司，但業務不大受疫情影響，好似新意網（1686）咁，主力做數據中心服務商，講緊係電訊網絡及雲業務，乃疫情過後的受惠股，今浪竟由高位急插逾三成，以其業績穩定性，配以4厘高息，中線坐貨穩膽！
唐牛
http://www.fb.com/tongcow88
http://www.fb.com/tongcow88