大台力捧小生黃子恆喺公司捱足多年，近年因為小生逃亡潮，有幸力谷上兩線，點知近日被爆佢同人妻裕美撻著，更影到裕美喺黃子恆屋企疑過夜兼晒bra，裕美亦承認同黃子恆發展感情，不過當時冇同對方講自己仍未搞離婚手續，而黃子恆亦拍片講想保護裕美……講就講係保護，之不過上周佢去完樂易玲生日P，就改口稱同裕美冇聯絡。

今日被周刊講黃子恆夜會朱晨麗，周一(4號)一齊去酒店傾偈，當日佢哋先約埋洪永城、唐詩詠及何雁詩等人一齊打羽毛球，跟手黃子恆陪朱晨麗返屋企換衫，二人再去附近酒店頂層餐廳食飯，揀咗個比較暗嘅位置坐，佢哋都刻意戴帽怕被人認到，食足3個鐘先走人。

報道都有問過黃子恆同朱晨麗就話佢哋最近一齊拍劇，問到黃子恆係唔係因為裕美單嘢唔開心，搵朱晨麗傾心事，黃子恆就話唔關事，只係打完波食飯，又話每個人嘅保護方式唔需要向人交代，總之佢嘅立場係保護裕美，更坦言朱晨麗只係朋友兼同事，朱晨麗亦叫黃子恆自己走先。

據知二人係上年拍大台劇《味想天開》演過情侶，未知係唔係多親熱戲份，先令佢哋結識，據工作人員向周刊講，黃子恆同朱晨麗都幾好，成日買嘢食畀對方食，有次佢哋拍親熱戲，二人仲錫得好投入，對望甜笑，唔通真係戲假情真……