古天樂今晚到金鐘出席活動，同唐詩詠一齊主持剪綵儀式，全程保持笑容，但見佢哋就冇乜交談。

儀式後，古仔接受傳媒訪問，見到古仔件外套好多鐵片裝飾，好似好重咁，古仔話：「係呀，都成十幾磅，相比之前拍戲着一件三、四十磅嘅戲服，已經輕咗好多，之前件戲服仲着到佢頸骨移位，睇咗兩個禮拜醫生。」古仔仲笑言，話自己剛痊癒就着呢件十幾磅嘅衫，真係驚自己唔死喎！

講到詩詠話會準備一個CV(履歷)俾佢見工( 新聞連結： http://bit.ly/2sgF9Qa )，古仔一聽到就話：「係呀，好吖，叫佢Send俾我！(有興趣簽佢？)等我睇吓先啦！(交換電話？)不嬲都識，識咗好耐！」再追問佢係咪真係有興趣簽唐詩詠時，古仔就有啲疑惑咁反問記者：「乜佢(唐詩詠)唔係有公司㗎咩？我都唔明喺邊度傳出嚟，話我要簽佢，我只係一名演員，冇資格話簽邊個囉！」

問到喺電影上會唔會再同詩詠合作？古仔話：「只係上次咁啱睇到佢套劇，覺得佢好適合個角色，所以同電影公司老闆推薦囉，如果將來有合適機會，都會同老闆推介佢(詩詠)，不過決策權都係喺電影公司老闆身上。佢真係可以sent 個CV俾我，等我再傳俾人。」可擔心傳下傳下變咗緋聞？古仔冷笑話：「呢啲嘢都係你哋(記者)寫㗎啫！應該唔會啦！」