美國《商業周刊》搞笑咁話：「星巴克（Starbucks）正用咖啡毒害呢個世界。」其實真正嘅意思係星巴克好似病毒咁，繁殖得好快，現時喺全球39個國家已經開咗1.35萬間分店，係過去10年全球增長最快嘅公司。星巴克不但出售優質咖啡，仲有好似宗教嘅文化特色，所以好受歡迎。

不過，星巴克正面對麥當勞咖啡（McCafe）步步進迫，有人喺《MSNBC討論區》問網友：「你認為星巴克會唔會俾麥當勞、美式甜圈Dunkin'Donuts，或者BurgerKing搶咗咖啡王國嘅寶座？」
GreyinTexas話：「我係星巴克嘅忠實擁躉，每星期幫襯3次左右，間中仲會買返屋企嘆，因為一杯香濃嘅熱咖啡喺手，個人都會醒神啲。」
ipen70就認為麥當勞咖啡好味啲，亦不滿星巴克成日排長龍要佢等好耐。JeffBFromCA講：「我喺星巴克有時要等成15分鐘，杯咖啡先到手，嘥晒我啲寶貴時間，好在啲員工有禮貌，先至繼續幫襯。」
NativeVermonter話：「我鍾意幫襯7-11便利店嘅咖啡，佢哋嘅咖啡種類繁多，價錢又抵，一大杯24安士唔使1.5美金（約11.7港元），喺星巴克可能賣5美金（約39港元）。」
Pekka講：「星巴克咖啡真係好貴，但呢間公司利用市場推廣滿足顧客嘅虛榮心，所以客似雲來。」