【誠實豆沙包】蘇超搞門線技術 賽會:「哪有錢?」
奧利梳爾門線技術喜伯年赫斯蘇超
近年唔少聯賽,都會引入科技幫忙球證執法,好似英超、德甲同法甲咁都有門線技術,而意甲更加已經用緊「VAR」(視像助理裁判)。不過都有啲聯賽因為資源問題,無辦法做到,例如蘇超咁,賽會就好坦白同大家講:「哪有錢?」
事緣係周三晚上,蘇超都有聖誕新年快車,上演「愛丁堡打吡」赫斯主場對喜伯年。比賽當中,喜伯年前鋒奧利梳爾禁區起腳,射中楣底彈入。從唔同角度慢鏡顯示,皮球已經完全過白界,但球證同旁證並冇表示,最後比賽打成0:0,喜伯年領隊尼爾連儂就話呢球波漏判,簡直係一個笑話。
賽後引發唔少人探討,蘇超係咪應該都引入門線技術呢?通常遇到呢啲問題,以香港官場常見做法,都會講研究下,或者會檢討咁。但蘇超賽會就好似食咗「誠實豆沙包」咁,表示科技的確係幫到場波少啲誤判,但就話大多數搞到嘅都係啲大聯賽,蘇超真係無資源搞,搞唔掂,夠哂坦白。
--------------------
BFB CHAMPIONS 2.0 聖誕新年活動連環出擊,登入即送傳奇球星「林伯特」! http://bit.ly/2xrTKGM