昨日個市挾高，期指升咗307點，啲淡友好傷，不過，個市爭持咗咁耐，終於出現突破，後市反而會好炒咗。港股好淡雙方伺機出擊，前晚美股升幅擴大，好友梗唔會嘥咗呢個大好機會，恒指「4頂」而破，淡友補倉補到氣咳，恒指靠近18000關，好正常。
炒短線最緊要睇技術走勢，𠵱家大成交支持技術破位，大方向必定當睇好嚟炒。大市推高，已經講咗好多次，必定要睇實滙控（005）同中移動（941），兩隻股輪流推上，咁就破咗位嘞。好多股民鍾意炒國企股，咁「龍頭股」係邊隻，今年嚟講，國壽（2628）霸咗個位，冇人同佢爭。

國壽C輪2464：國壽上個禮拜創咗16.82元新高後出現技術調整，試完條10日線再試20日線，前日已經升番上10日線樓上，仲升破咗短線下降阻力軌，9RSI同埋MACD都轉番好，昨收15.78元，應該好快上試16.30元，破位向18元推進。國壽C輪2464昨收1.26元，論數據同埋活躍程度，比好多其他C輪好炒，槓桿率12.5倍（有效6.8倍），引伸波幅31.8%，對沖值0.54，正股升破16元，隻輪嘅爆炸力會好勁，正股升上16.30元，2464唔會低過1.50元，升上18元，2464會喺2.60元樓上，現價買，正股跌穿15元止蝕。
俊樺