無論係咪真心支持，身為特首嘅梁振英去立法會宣讀施政報告喎，全體官員按慣例，都要出席撐一撐嘅！梁班子噚日亦一早喺議事廳現身，等住聽吓佢哋嘅同事（定同志？）領導，有啲乜嘢大計要搞？早到就梗係喺議事廳內周圍走、吹吹水，但八方現場所見，有位官員卻孤伶伶生人勿近，唔通佢係傳說中嘅「天煞孤星」？

其他局長　議員　開心打牙骹

八方噚日去到議事廳，見到政制及內地事務局局長譚志源、保安局局長黎棟國、財經事務及庫務局局長陳家強已經到場，其間不停有議員圍埋同佢哋傾偈；近期為「網絡23條」打緊仗嘅商務及經濟發展局局長蘇錦樑，亦有唔少議員同佢打牙骹，唔知係咪交流反拉布心得？政務司司長林鄭月娥一嚟到，亦圍住吹埋一份。啱啱傷癒嘅食物及衞生局局長高永文，到場後亦好受歡迎，民建聯葛珮帆等都上前慰問一番。
咦，點解當中有人孤伶伶坐埋一邊？睇真啲，原來係教育局局長吳克儉。噢，咁陰功豬冇人理？係其他人冇吳得掂咁博覽群書，唔敢上前開口露底？抑或大家冇遊日睇紅葉，圍埋都冇乜心得可以分享？

李八方
mailto:[email protected]