【新增內容及圖片】
韓國人氣綜藝節目《Running Man》已鐵定播到明年2月26號就結束，而今日《RM》再次進行錄影，今集錄影內容就唔會邀請嘉賓，到時節目組同成員會因為之前《RM》嘅風波向觀眾道歉。

今日下晝就有粉絲影到《RM》六名成員劉在錫、宋智孝、金鐘國、李光洙、HaHa同池錫辰現身拍攝，當中智孝及金鐘國企最左邊，二人神情都有啲凝重，而且披上毛巾，似乎係剛玩完要濕身嘅遊戲。而光洙於另一組照片中，就被影到做出打氣嘅手勢，唔知今次拍攝嘅主題係咩呢？而鏡頭後，金鐘國就笑晒口又舉V地跟一名小朋友合照。

雖然今日《RM》成員要趕拍節目，但係佢哋會喺完成錄影後，就撲去今晚舉行嘅《SBS演藝大賞》，估計到時六位成員都會出現，唔知已退出嘅Gary會唔會撐場呢？不過今次就會係《RM》成員最後一次以《RM》名義亮相《SBS演藝大賞》，所以份外有意義，希望今晚佢哋可以拎到大獎啦。

另外，自「炒魷風波」後，《RM》嘅官方Instagram一直都冇更新，不過節目組今日就先後公開今日播出一集嘅花絮照，當中今日播出一集就邀得金所炫做嘉賓。