財爺鬍鬚曾正埋頭寫預算案，由於內容係高度機密，會否減稅、有冇糖派暫時未見端倪，八方最近聽到個消息，納稅人對下個月公佈嘅預算案，都係唔好抱太大期望。
金融海嘯下嘅預算案好難落筆，據講鬍鬚曾日思夜想，絞盡腦汁毫無頭緒時，會行出官邸花園，花園有棵樹，樹上有竇雀，應該係一家四口白頭翁。呢竇雀喺呢處築巢，都算與鬍鬚曾有緣，八方聽聞鬍鬚曾好重視呢幾位「鄰居」，不時會同幾隻雀閒話家常。

無計可施同雀仔傾偈

鬍鬚曾同幾隻雀談話內容只得佢哋幾個知道，外人無從置喙，近年興起「動物通心術」，經訓練者據講有同動物溝通能力，唔通鬍鬚曾都識？政界中人聽到呢個消息卻話大事不妙，事關鬍鬚曾近日聽咗唔少預算案意見，咁都無計可施要同雀仔傾偈，見微知著，來年度嘅預算案都唔慌有大動作。
煲呔幾個月前推出110億元利民紓困措施，用咗庫房唔少彈藥，搞到鬍鬚曾要睇餸食飯，正所謂民望輸少當贏，八方從佢言行分析，相信預算案但求穩陣過關，了無新意居多。預算案內容未必有新奇嘢，宣傳方式卻有新搞作，鬍鬚曾情商港產漫畫家李志清（清兒）畫政治宣傳漫畫《明日．今天的未來》，向後生仔宣傳財爺關心失業、貧富懸殊問題嘅訊息，同時曉以大義，等佢哋明白「今天的一個決定，對明日有重要影響」。

預算案漫畫下周出版

清兒前年奪得日本外務省首屆「國際漫畫賞」最優秀獎，真正畫出彩虹，佢以畫歷史漫畫聞名，代表作有《三國志》、《孫子攻略》等。原來佢85年已發表時事漫畫，曾為《大公報》畫政治漫畫，今次做「官方喉舌」，佢覺得與一般商業機構合作無異，因為每間公司都有編輯方針，創作係冇絕對嘅天馬行空，總有遊戲規則，「政府搵得你，一定係有嘢想宣傳，件件job都係咁㗎啦。」清兒嘅「預算案前傳」共120頁，故事佔100頁，其餘20頁係失業率、經濟增長等數據，下周五正式出版，免費派發。八方唔知一般市民有幾大興趣，官場中人卻認為條橋work，其他部門都想效法用漫畫軟銷政策。

mailto:[email protected]