「姿態好誇張啫！」韋達與潘頓一段對話 揭一匹冷馬究竟有幾勁
蘋果日報 2019/12/26 14:12
莫雷拉韋達潘頓雷神谷戰偉大勝利量化歡騰一段對話
韋達馬房服役初出自購新馬真係威震四方，「超能力」、「輝煌芯」同「量化歡騰」先後一出即勝，三位鞍上人分別係田泰安、巴度同史卓豐，可見廐主會「分散投資」，唔會過份倚重某一位騎師搏殺。
眼見韋廐生力軍如此成功，三屆冠軍騎師潘頓當然亦流晒口水，他在晨操空檔時，於停機坪遇見路過的韋達，少有咁主動出擊送秋波。
潘：「你匹新馬（『量化歡騰』）嘅姿態好誇張啫，14檔出閘，全程走三叠，冷到48倍都照贏！」
韋：「係呀！你可以想像一下，如果匹馬（當時）貼到內欄競跑，走勢會勁成點！」
韋達講完後就返入馬房，韋達今季同沈拿合作愉快，攜手取得五冠一亞四季，即係話韋廐目前14場頭馬之中，約四成來自呢位意國騎師手筆。
可惜沈拿因策何良馬房「與龍共舞」未盡全力被罰停賽，而且不獲馬會續牌。
韋廐呢個靚碼頭好多騎師都虎視眈眈，潘、韋好少合作，至今四戰取得兩亞，未有頭馬見面，但韋廐兵源充足，如果得到倉主歡心，對潘頓自己爭做冠軍騎師，將有極大幫助。
潘頓最大對手莫雷拉就快佢一步，佢雖然亦只曾同韋達合作四戰，但就獲得一冠三亞全入Q。
今晚（26日）谷戰第三場四班1650米，雷神接手策韋廐「偉大勝利」。
此駒上場抽配日本騎師川田將雅出戰騎師賽次關，直路由包尾位置如飛殺上跑第四，只負頭馬「夢幻戰士」0.75馬位。
若非「偉大勝利」末段持續向內斜跑影響衝刺，當時肯定可以上名。
今次強配騎技高幾倍的嘅雷神，勝利鐘聲係時候敲響啦！
