【新增內容】

57歲的蔡楓華（Ken）當紅時，以百萬保時捷代步，現在駕駛的「雷諾」，馬力比之前保時捷更大，他說︰「我未揸過房車，以前保時捷203匹，依家雷諾265匹，好快。」Ken又稱，自己在蘇屋邨長大，當年目標是做百萬富翁，其次是買單門跑車。

談到早年他的經濟狀況一直不太理想，但Ken指自己近年儲了不少「彈藥」，經濟漸入佳境。受訪時他又突然提起「四大癲王」稱號，且表現激動謂︰「我覺得做人最緊要爭氣，為自己爭啖氣，我唔理人哋講我咩！以後我再聽到咩四大癲王，你唔使同我講，我即刻出律師信，你試吓！再講我有精神病，我即刻告你誹謗。唔使諗！我蔡楓華一定告，因為你以前恰我冇錢告你吖嘛！我依家有，我要攞返個公道。」

Ken續謂：「你話我黐線？證據呢！我隨時可以搵個精神科醫生寫張紙，我根本就冇。嗱！好似最近盧凱彤，好可惜！嗰啲真係有病。佢有咁嘅病，應該關懷佢，唔通嗌人五大癲王咩？咁張國榮都係，佢係六大癲王喇喎！」

說到早前墮樓離世的盧凱彤，Ken認為人在大紅時更易萌輕生之念，更爆自己都曾經試過︰「其實愈紅愈易有自殺傾向，86年嗰陣好紅，唱片賣得，賣幾十萬隻，壓力好大，喺伊館開6場演唱會，又驚唔爆，又驚人哋唔睇你，好多嘢湧埋嚟，你就會萌輕生之念。不過有網民叫我好好珍惜自己，因為嗰個年代，一線嘅偶像派歌手，得番我一個。冇晒嘞！」

訪問期間，Ken主動重提當年與張國榮的恩怨，又強調自己被「冤枉」，更連講了五次，重重心結未解。Ken於85年替《勁歌金曲》季選任司儀，張國榮獲獎後他說了一句「一時嘅光輝未必係永恒」，即時被拍擋盧敏儀「鬆踭」截停。Ken說︰「我係冤枉！……我當時唔係攻擊張國榮，係陰差陽錯，係盧敏儀截咗我，我仲想講嗰一句『希望張國榮就永遠保有呢個永恒落去。』」

自稱含冤33年，Ken說：「我承認張國榮係一個天王巨星，我嗰句說話咪提醒咗佢係天王巨星囉！咁我嗰句說話係咪真理先！好似曾蔭權，做過特首，無端端變咗階下囚，你話嘞！剎那光輝係咪唔係永恒吖？，點解你哋一口咬定我係妒忌張國榮？惟一原因係因為我唔夠張國榮紅，所以屈我囉。如果我好似劉德華咁紅，你哋就會話蔡楓華講嘅嘢係啱。但冇人同我呼冤，同我擊鼓鳴冤。」

蔡楓華十月中開個唱，個唱前他已經積極練歌及修身，更刻意減磅，由之前170磅減到150磅，他說作為藝人，keep好外形也是一種專業︰「因為血糖高問題，我要減磅唔係易，惟有食少啲，依家一日食兩餐，戒澱粉。今次我會唱好多人哋嘅舊歌，我以前開騷會早兩、三個月就練歌，但我依家發覺騷前一個月左右開始練係最好，因為可以keep住個mood，開騷嗰陣感情發揮會更加淋漓盡至。以前我出道嗰陣，黎小田都讚過我，因為我12歲學正統聲樂，唱歌難唔到我，嗰陣黎小田就話我，阿Ken，你係差少少閱歷，但依家閱歷我有！」見盡世情的蔡楓華，唱歌感情的層次表達比以前更精湛。
他說雖然在荃灣大會堂開騷，但毫不欺場︰「一個1,420人嘅場館，我樂隊全部full band，仲有音響，個騷都投資咗七位數，音樂方面一定做到最好。」

撰文︰祖李
攝影︰林德雄、葉君海
場地提供︰Meeting@Causeway Bay

精選娛聞，喺晒《娛果》
http://fb.com/appledailyent