早排特首林鄭月娥扮少女，以一身紅裙襯黑絲，再斜孭Ferragamo小手袋現身公開活動，令唔少人「挖目」相看後，民記元秋蔣麗芸噚日亦以一身夏季限定look現身立法會，唔少記者睇到嘩嘩聲。元秋除咗同林鄭一樣，孭起個細細嘅少女feel黑色斜孭袋，更加紮起唔算長嘅頭髮，仲襯一身黑褸、黑褲、黑涼鞋，最最最重要係配上一對令人意想不到嘅肉色絲襪！

兩日狂煲《權力遊戲》

元秋透露，當日見到林鄭個用斜孭袋時，驚覺同自己一樣，笑言：「佢（林鄭）仲着條娃娃裙，嚇到我暈咗！」至於佢自己噚日新look現身，除咗因為天氣熱，亦因為放假，所以想着得輕鬆啲，大讚用斜孭袋出席酒會勁多好處，「可以一隻手飲嘢，一隻手同人握手」。
雖然元秋轉咗呢個夏日look，但佢話老公並唔發覺，話兩夫妻相處一段時間後，唔只連髮型轉咗唔察覺，有時連朝早未打刷牙洗面都唔知，「就好似左手同右手間嘅感覺，已係變咗一個人」，會覺得無論對方變咗乜樣，都一樣欣賞，「最重要係個感覺」喎。
向來愛國愛港的元秋又話，最近放假主要留喺屋企煲人氣美國電視劇《Game of Thrones》（權力遊戲），「我好威呀，人哋5季，我用兩日時間就睇完咗」，透露自己為追劇，不惜一路食飯一路煲，「放假就係咁hea㗎嘛！」

李八方