鄭佩佩囡囡原麗淇演出嘅美國獨立電影《殺妻劫》噚晚喺圓方舉行世界首映禮，鄭佩佩同另一個囡囡原子鏸都有捧場，其餘出席首映嘅，有呢齣戲嘅導演戴斯費蘭、演員文峰同埋連麗婷等。

原麗淇同媽咪鄭佩佩一齊做訪問，麗淇就話部戲其實喺四年前拍咗，因為導演有其他project要做，加上又要做後期，所以依家先上映，佢又大讚戲中演員演得好好，而佢嘅角色係演一個神秘人。

鄭佩佩日前攞咗英藝獎，據知，呢個獎係表揚喺內地發展有好成績嘅香港藝人，佩佩姐話：「當晚兩個女已經請我食飯，不過佢（麗淇）就比較難見，唔係成日返嚟，但喺每年聖誕同過年我哋都會一齊。」

囡囡麗淇又話有興趣喺香港拍戲，仲透露依家寫緊劇本，想搵媽咪一齊合作，佢話同媽咪互相認識同了解，又有人生經驗，合作時會知道可以演啲乜。被問佢哋戲中係咪都係做番母女？麗淇賣關子話可能唔係，但有個故仔又可能係，佩佩姐話好期待同麗淇合作，仲讚麗淇演戲好好。