當年今日
關於我們

【黃日華踢波鬆一鬆】閉關陪媽咪休養 黃芷晴:爹哋迫我哋睇《義不容情》

蘋果日報 2018/12/11 15:24

黃芷晴黃日華梁潔華

黃芷晴、劉佩玥、林宣妤、龐景峰今日喺銅鑼灣出席護膚品活動,黃芷晴月初出席活動,主動澄清媽咪梁潔華唔係癌症復發,而係喺8月接受骨髓移植手術,目前休養中(新聞連結: https://bit.ly/2RHxSRU )。今日喺活動上,講到媽咪依家嘅情況,佢話:「嗰陣佢完成換骨髓手術,住咗醫院三星期,依家係康復中,要觀察有冇排斥狀況,醫生話有好過冇,但唔可以太嚴重,因為有少許排斥代表新骨髓運行,不過最初都好擔心。」
芷晴話過去幾個月同爹哋黃日華齊齊閉關陪伴媽咪養病,日前《蘋果》影到華哥去咗踢波鬆一鬆(新聞連結: https://bit.ly/2L8flvC ),芷晴話:「爹哋已經好乖,一個禮拜只係踢一日波,其餘時間全天候陪住媽媽,依家大家都放心晒。」佢仲話依家媽咪間中都可以出街,不過只可以去一啲人少地方!
講到最近重播華哥當年主演嘅劇集《義不容情》,芷晴話:「我哋一家人都有一齊睇,爹哋以前都有錄影帶,間中食飯時候都會迫我哋睇,當時爹哋只係得27歲,個樣到依家都冇變過,講嘢語氣都一樣,好成熟,仲成日問我佢勁唔勁,我話係呀,好勁。」
另一方面,劉佩玥有份主演劇集《救妻同學會》被批評麻麻,佢話:「好壞意見都接受,知道有啲人睇得唔明白,套劇情節比較新穎,穿插時空,要用腦去思考,評語無論好定壞都好,有聲音就係好事。」至於今年出席台慶頒獎禮嘅戰衣,佢話:「準備好喇,會同過往形象唔同,之前少女味同公主太多,被人投訴,今次會有少少性感。」
精選娛聞,喺晒《娛果》
http://fb.com/appledailyent
empty
攝影:仇志德(左)、孔志豪(右)
empty
黃芷晴話媽咪嘅情況好好。
empty
劉佩玥唔介意被批評,總之有聲音就係好事!
empty
林宣妤(左起)、劉佩玥、黃芷晴齊齊出席活動。