周中輪到國際賽主打，除咗幾場歐洲國家盃外圍賽叫做有意義，其他都係友賽，以歐洲聯賽打到如火如荼，球星又要顧住球會老闆，呢啲太公波唔會太認真。
先講法國對希臘，法國喺世界盃後，都冇咩大換血，仍然係亨利、韋拉、馬基列尼呢啲年紀有番咁上下嘅球員壓陣；老鬼就有一個好處，係知道邊啲波值得博，邊啲波值得留，你睇呢幾場亨利打聯賽嘅表現就知啦，未到大賽都唔畀咁多真功夫你睇；今次主場對住希臘，希臘叫做衞冕歐國盃冠軍，而且近況有番啲起色，防守畀到你信心，立博開出嘅亞洲盤，法國要讓到一球/球半，法國好難贏到兩球，下盤好穩陣，不過足智彩就冇開；咁就一於捧讓球主客和「和局」。