由韓國女神孫藝珍與韓劇《機智牢房生活》男星丁海寅合作嘅JTBC新劇《經常請吃飯的漂亮姐姐》（漂亮姐姐）噚日首播，之前導演已暗示劇集係以「雙宋」呢對姊弟戀做原型，噚日一開播片頭已甜蜜爆燈，丁海寅man爆抱起孫藝珍狂咀。

而噚晚首集就講孫藝珍同律師男友分手，並與死黨張少妍飲酒傾心事，而死黨嘅弟弟丁海寅喺海外返來，兩人三年冇見就像姐弟般吵吵鬧鬧起來。孫藝珍喺丁海寅車上哭到瞓着咗，丁海寅仲偷影孫藝珍嘅瞓覺樣，被姐姐發現。

孫藝珍前度嚟公司搵佢，兩人喺公司門外拉扯，丁海寅見到即霸氣攬住孫藝珍走人，第二日仲有唔少女同事打聽丁海寅係邊個。而今晚一集就話孫藝珍嘅同事同丁海寅搭訕，搞到孫藝珍嬲嬲豬。噚晚劇集首播雖然就打破唔到朴海鎮嘅《秘行要員》嘅4.055%開播紀錄，但首播仍有4.008%收視，喺收費台方面開播收視成績相當唔錯。

更多韓流，喺晒《娛果》
http://fb.com/appledailyent