古天樂、張智霖（Chilam）、鄭嘉穎、宣萱、黃宗澤同劉浩龍等，噚日齊齊現身尖沙嘴文化中心露天廣場拍攝一部新片。現場有過百臨時演員，加上多位演員，咁大卡士陣容，最近都少見，當中古仔等人更有拔槍鏡頭，氣氛緊張。

電影市道麻麻，除咗因為受到反送中引發嘅社會問題，呢幾個月香港都比較動盪之外，最主要係今年受中美貿易戰影響，仲有內地過份審查題材，搞到內地有超過1,800間電影公司執笠，唔少投資者都唔敢開戲，就算籌備好都要放埋一邊先，台前幕後好多人都冇工開。好彩古仔、Chilam似乎唔受影響，工作陸續有嚟。佢哋噚日大清早就喺尖沙嘴開工，仲精神奕奕。

傳出爆炸聲

現場所見，全部男演員西裝上陣，場面好大陣仗，仲搭咗一個反恐會議演講活動場地，有好多臨記扮觀眾同記者，而古仔、Chilam、劉浩龍就飾演G4保護組人員，負責保護扮演演講者嘅宣萱。當大家聽緊演講時，突然傳出槍聲同爆炸聲，在場人士都嚇親。呢個時候古仔等G4即刻拔槍，古仔仲走向坐喺輪椅、戴住冷帽嘅黃宗澤身邊，除低佢嘅口罩，當時鄭嘉穎推住黃宗澤，現場氣氛一片混亂。

未埋位時，眾演員都表現輕鬆，而古仔拍完開槍戲之後先行離開，其他演員繼續拍攝。而劉浩龍等埋位時不停「放蚊」，個樣好攰咁。
撰文：馮仁昭