由韓國男星朴敘俊同女星朴敏英合作嘅tvN人氣韓劇《金秘書為何那樣》噚晚播出第八集，要劇集受歡迎，自然要有第八集咀嘴定律，噚晚一集《金秘書》，「雙朴」終於咀嘴，即時咀出高收視，創開播以來8.12%新高。

承接上一集，朴敘俊喺雨中浪漫為朴敏英擋雨後，兩人就進行孖住燒烤，不過朴敘俊因為第一次燒烤關係，所以燒到啲肉燶晒，最後兩人只好點pizza食，此時朴敘俊更體貼想為朴敏英抹嘴，仲想趁機咀落去，點知佢嘅童年陰影又再來襲，令佢即時縮開，朴敏英因為上次兩人險些熱吻，但最後關頭卻被朴敘俊推開，於是朴敏英就開玩笑反問佢：「今次你想推我去邊？」於是朴敘俊就向朴敏英承諾自己一定會克服，令朴敏英好感動。

朴敘俊嘅媽媽得知朴敏英就係當年和愛兒一齊被誘拐嘅女仔，於是就請朴敏英到家中同佢傾談往事，而朴敏英就發現朴敘俊嘅哥哥李泰煥腳踝上卻冇被膠索帶索過嘅傷痕，心中大感奇怪。晚上，朴敘俊人肉速遞糖果搵朴敏英，睇住朴敘俊背影，眼淚不自覺流了起來。

喺李泰煥嘅小說座談會上，李泰煥突然表白指自己絕對唔會放開陪喺身邊嘅孩子，又會賭上一切去守護「她」，朴敘俊因為聽到哥哥心中嘅想法，於是即刻起身走人，朴敏英知道朴敘俊誤會咗二人嘅關係，於是就出去向朴敘俊表白：「我喜歡你」，朴敘俊想咀朴敏英時又再次被陰影所纏繞，於是朴敏英就反過來作出主動，進擊地咀朴敘俊。

下一集兩人嘅戀情就快被公司同事發現，而兩人亦喺辦公室不時sweet sweet，甜蜜戲碼即將展開。

更多韓流，喺晒《娛果》
http://fb.com/appledailyent