美國最大車廠通用汽車（GeneralMotor）次季業績轉虧為盈，上半年汽車銷量更領先死對頭豐田；美國第二大車廠福特（FordMotor）亦結束連蝕7季嘅窘境。美國車廠形勢大好，唔通佢哋真係開始發威？
《華爾街日報》網上版做咗個簡單調查，發現有三分一網友認為美國3大車廠好快就會收復失地；三分一認為美車廠有排先可以重返昔日光輝歲月；亦有三分一網民睇死呢3間底特律嘅車廠翻唔到身。

MrNuke143喺討論區直言：「如果美國汽車工會（UAW）肯讓步，啲人唔再貪得無厭蠶食車商利益，再換埋啲無能高層，3大車廠都仲有一線生機。」
davidzislin就覺得：「過去4年，美國經濟都算好景，如果啲車廠喺呢段期間都賺唔到錢，到經濟衰退時，都唔知佢哋點捱落去。講真，我覺得佢哋最失敗係製造太多冇人要嘅老土車款，好心佢哋就減少生產啲唔受歡迎嘅牌子，減少啲經銷代理數目，專注搞好產品啦！」
不過，亦有唔少網民力撐美車廠絕對唔輸蝕畀國外競爭者，CrescentCorp話：「美國3大汽車巨頭家陣生產嘅車款同質素，好多都媲美海外對手，只不過係啲客有偏見，唔肯信、唔識欣賞啫！」