陳寶珠同兒子楊天經、梅雪詩（阿嗲）、劉千石今日喺中央圖書館出席紀念恩師劉春草教授師生作品展揭幕活動。

寶珠姐話佢自己對畫畫完全冇天份，畫極都唔似樣，更笑稱：「你叫我織冷衫就可以，畫畫真係唔得，只係識畫一啲簡單有花、有樹、有太陽畫面，反而書法就學習過，因為以前曾經喺廣州讀『卜卜齋』學堂，仲會用書法抄經，覺得書法都可以令人平靜。」而阿嗲就話細個讀書時畫畫曾經貼堂，但就冇時間學習，覺得畫畫都幾好，可以陶冶性情。

楊天經就話自己同媽咪一樣，畫畫唔得，反而曾經學習書法，問到寶珠姐有冇收起自己毛筆字珍藏？佢話冇，而天經話：「我就有媽咪好多珍藏，因為細個時候媽咪都送咗好多生日卡畀我。」不過寶珠姐話：「阿仔都好耐冇畫過卡俾我，o依家寫字多，會寫低心目中想同我講說話，有時好好感動，呢啲我就會收藏起。」

精選娛聞，喺晒《娛果》
http://fb.com/appledailyent