「有部Evolution新車，唔知有無興趣試吓呢？」有，不過早幾個月已經試咗最新嗰部十代露筍囉喎，Sorry，呢部係5.5噸CanterEvolution，又叫露筍。甫見，火紅車身浮誇又搶眼，加埋超強性能，果然寸得起！

記者：梁美甜
攝影：王文忠
模特兒：IshaC@StageModels

慳油性能勁

每日返放工都會見到以下場面：喺環保大道總會有大排黑煙嘅貨Van、大貨車，環保喎，真諷刺！亦因為咁，越加欣賞嗰啲環保車，尤其係商用車，你可能諗：「環保車唔夠力，容乜易要跑多轉又或者載少啲？咪講笑喇！」OutDate喇，𠵱家嘅商用車，唔單止符合歐盟四型嘅廢氣排放規定，仲加配咗唔同裝備，好似三菱最新嘅5.5噸CanterEvolution咁，有名你叫，Evolution咪露筍囉，咪誤會，唔係將Lancer露筍副偈放入部貨車，而係新車性能強，有如露筍般強悍。新車採用全新4M50-5AT5直四汽缸共管噴注廢氣再循環系統，加埋可變角度渦輪增壓附中置冷卻器柴油引擎，供油同噴注程式經特別調校，令馬力輸出高達180匹，運轉至1,600rpm時已經可以輸出54.0kgm扭力，配合17.5吋鋼線真空輪胎，起步、加速、轉彎抓地力等表現強悍，搭配六前速波箱，波棍較短小，轉波快而順滑，反應靈敏嘅同時亦大大減低耗油量！

安全系統又環保

咩車都好，舉凡轟轟聲等同於燒銀紙，廢氣亦實勁，CanterEvolution講明符合歐盟環保四型，咁都不特止，新車搭配全新環保系統，包括廢氣再循環裝置、電子控制高壓共管噴注系統、柴油氧化催化器、微粒氧化催化器等等，坦白講，我唔係大偈亦唔無機械知識底，只係知道成副系統可以自行過濾廢氣，大大減低污染，如果真係無咩廢氣嘅話，係咪以後停車就唔使熄匙呢？副偈咁勁，性能咁強，無番咁上下安全性咪好危險，係，所以新車無論車陣、防撞桿、防滾桿等等都強化咗，加上配備雙迴路真空輔助制動系統同自動攝迫力系統，係就係大大提升安全性，咁並唔代表坐上駕駛席時等同於車手，搵食啫，唔使劈住走，車身性能好，提升駕駛樂趣同享受，做起事上嚟咪快、靚、正囉！

高妹試車

三菱CanterEvolution5.5規格

引擎：4,899c.c.直四雙頂凸輪軸16氣閥，可變角度渦輪增壓連電子控制高壓共管噴注系統
馬力：180ps/2,700rpm
扭力：54kgm/1,600rpm
傳動：六前速手波
車價：$288,650
查詢：環宇汽車（23955237）