46歲嘅李蕙敏，今日喺商台宣傳新歌，佢同老公結婚多年冇所出，佢坦承試過兩次（IVF）人工受孕但唔成功，因為呢半年過程都幾辛苦，佢會停一輪，之後先再決定，O依家都有中西醫調理身體，佢話：「因為會改變個人嘅荷爾蒙，人會變得腫，而且太瘦個肚冇肉，拮針落去好困難，人會更辛苦，人情緒冇咁好。有朋友本身好開朗，試咗之後佢都話想死。」李蕙敏話辛苦過返工，要抖下回氣。

幸好呢個時候，李蕙敏老公喺身邊支持，凡事順其自然，而佢哋一直有領養打算，佢話：「就算生到都想領養，因為老公想有兩個，佢本身有個妹，家庭成長好理想，一家生活好幸福。」李蕙敏講明兩公婆領養唔會特別揀咩國籍，亦唔會刻意揀個香港小朋友，佢話曾經冇外籍朋友領養香港小朋友，之後仲一齊去英國生活。