一如先前所料，將喺月底開始預售嘅新版Mazda6，引擎配搭將會升級到最Top嘅2.5公升型號，兼且注入咗廠方獨有嘅S-VT連續可變活瓣正時系統，減低廢氣排放同耗油量之餘，馬力同扭力輸出仲可以達到170ps/6,000rpm及226Nm/4,000rpm；另外，新車仲配備咗全新嘅5前速半自動波，大家千祈咪睇小佢，原來廠方特別為佢加入咗源自RX-8嘅AAS主動式智能轉檔系統，佢可以根據路面傾斜度、油門深度同軚盤轉向角度等資料，嚟決定使用最適合嘅波段，從而令行車表現更穩定同順滑，加上全新造型同車廂陳設，都可以令車迷有耳目一新嘅感覺。至於Fans們最關心嘅售價，到呢一刻代理都仲未公佈確實數字，但價錢就大約係24萬元，而且仲會喺今個月底開始預售㖭！
若然你都係對現行款式情有獨鍾嘅話，大可諗諗代理尚餘嘅極少量Mazda6陳列車及經理車，其中2.0版本售$159,990，而2.3版本則售$189,990起，有興趣嘅朋友就要趁快啦！

記者：鄭達基