萬人迷金城武嘅感情生活一向好鬼神秘，佢嘅緋聞都算少之又少，不過上星期佢喺台灣終於斷正，俾記者影到有一個身材高䠷嘅清秀美女攞住袋便檔紙盒去咗佢屋企，幾個鐘後阿武親自開車載埋呢個女子又一齊外出食飯。但當佢哋發現有記者影相時，又即刻用手遮面，個女仔仲驚到由前座匿到後座，戴住帽嘅阿武就踩足油門快閃。

疑戴同款戒指

報道仲話呢個女仔左手無名指戴嘅戒指，同前年阿武傳出婚訊時所戴嘅戒指款式好似。雖然佢經理人姚宜君否認話：「絕對不可能！金城武是單身。」但係上個禮拜阿武喺米蘭就俾人發現佢同呢位靚女同遊，原來呢位靚女係日本模特兒，佢兩個喺日本認識，已秘密發展咗接近兩年！對於呢個講法，姚宜君又有一番解釋，噚日佢話另一女助理陪阿武去米蘭，唔係呢個女子，亦唔係日模，亦冇秘密交往喎。
此外，阿武噚日去咗北京出席《武俠》首映，同場仲有陳可辛、甄子丹、湯唯同惠英紅，但金城武並冇回應自己嘅感情事。另外，甄子丹喺呢部戲嘅戲份同金城武差唔多，問佢驚唔驚俾對方搶戲？甄子丹話：「一部有深度的電影本來就要很多人物，有了金城武的角色，才有不同的元素，讓電影更豐富。」