現年37歲、新一代大台筍盤陳智燊(Jason)，同2007年華姐冠軍宋熙年拍拖多年，Jason今年7月向30歲宋熙年求婚成功，將於年底結婚。

Jason噚日5點幾同女友宋熙年，仲有高海寧（高Ling）約埋喺中環必列者士街嘆茶，雖然高Ling有樣、有身材，算係唔少宅男心目中女神，但Jason完全被女友宋熙年所吸引，高Ling喺Jason面前，似乎發揮唔到吸引力噃！

當時高Ling唔知講緊乜，全程表現得好肉緊，仲加好多肢體動作，先至表達到佢想講嘅嘢，不過，陳智燊好似唔係好專心，坐坐下又挨埋女友度，一時又捉住女友隻手仔玩吓咁，而三個人之中宋熙年就最眼利，好快就發現記者影相，不過3個人都冇避忌，兼同記者揮手打招呼添！