前日，黃國英同孫柏文一齊做節目《你貼股我教路》。講起大陸經濟時，黃兄提到大陸發電量嘅趨勢，令人對大陸經濟表現產生憂慮。
咁黃兄噚日喺佢專欄《英之見》度，就再講話大陸5月上旬嘅用電量跌幅擴大至3.9%。大家試諗下，國民生產總值GDP，即全國生產量提升嘅話，用電量會加定減？相信大家都會話加。
不過有啲信大陸一定成功「保八」嘅樂觀派，即係嗰啲H股指數過萬點仲追嘅人，就一定唔同意。佢哋會話：「用電量跌咁又點？保八、保八、保八！」
為大家計計數。假設舊年全國用咗100度電，去生產值100蚊嘅產品同服務，今年數據話「保八」成功，全國生產值108蚊嘅嘢，不過只用咗96度電。其他嘅唔好讚，淨係我國用電效率升咁多，從環保角度都可喜可賀！
當然，如果你真係信大陸用電效率升咁多而追入H股嘅話，我有批千禧年dotcom股票你應會有興趣。