今個月開幾個新盤，樓市有番生氣，代理行收入比上個月明顯多咗，好似中記，頭十九日淨係住宅部佣金，已逾六千三萬，激增六成二。
中記執董陳永傑，見氣勢咁好，就出戰報，搞比賽激勵士氣，叫前線「每人多行一步，盡量食到盡」。
執董話，比賽設營業額與宗數兩個大獎，分單月及季度計算。若分行單月營業額達八十萬，或促成二十四單生意，該行經理就可以攞到最高千五蚊獎金同金牌。
第三季累積生意百八萬，或促成七十二宗成交嘅分行，可以額外多五千蚊獎金。

年輕置業好易一身債
樓價喺舊年「沙士」後大幅反彈，好多小業主都趁機鬆綁，但部份屬於「投降」離場。
蘭西最近聽到個真實故事，話有個年輕人，幾年前借政府錢上車，買入二百零萬市區單位，今年開始要還政府錢，計過條數，發覺唔係好掂，諗咗一輪，終於忍痛壯士斷臂，蝕咗幾十萬，重無端端孭上一身債。
聽講，原來都有幾多後生仔，好似上述嗰位咁樣上車。「便宜莫貪」呢句話，真係冇錯㗎。