有感連登仔在民間記者會上，哽咽問蒼天，香港每日槍林彈雨，但作為特首嘅林鄭月娥就埋怨自己冇得去Salon!真係聽者流淚。究竟邊間Salon搞到林鄭上晒頭？

本著壹仔「求真」精神，小宗殺上去林鄭嘅御用Salon查找原因。此Salon位於灣仔軒尼詩道樓上鋪，對面正正是灣仔警察總部，林鄭雖然已到「官到無求膽自大」之境界，但焉有膽色勇闖此示威熱點？

呢間Salon開業廿幾年，幫林鄭嗰位師傅Daniel Lau，外表好老實，「款頭」似足跟住林鄭後尾嗰幾件年過六十嘅高官，如張建宗、羅致光、陳帆嗰款咁。但髮型師好專業，避談政治，好有耐性同客仔講解每種染髮牌子分別，剪髮都好細心，一小撮 、一小撮慢慢剪，絕無sharp cut，單是剪髮花近大半個鐘，又懂得天南地北，由港交所壞機到去日本買「五十護」洗髮水 、再到山頂富豪「到會」理髮都是話題，絕無悶場，Salon 裝修簡樸，最正喺播住七十年代嘅英文歌，如Air Supply，相信林鄭係度洗髮恤頭係最大享受，聽住佢年代嘅音樂，陶醉於讀書時考第一嘅美好回憶。

林鄭對此髮廊如此着迷，戲肉係洗頭部份，師傅對「肉手」認真頂呱呱，洗完頭用護髮素同你捽吓、捽吓個頭頂，再用手指公由耳仔「憟」落去條頸，再用手指壓頸椎位置，重複咁按足10分鐘，小宗親身感受按完成頭發熱，血液循環令人好鬆弛㗎！分分鐘會上癮㗎！唔好誤會，林鄭尊貴嘅頭殼，又點會俾洗頭仔去摸呢？呢位洗頭嘅係女師傅嚟㗎。

林鄭幾個月冇得去Salon洗頭，等個頭腦清醒吓，搞到腦閉塞，將香港推向深淵，你話無得去Salon幾咁大嘅犧牲呢？

撰文：宗青華