新春伊始，踏入狗年，林保怡日前帶埋佢11歲嘅寶貝雪橇犬阿水喺西貢行番個大運，順祝大家新一年開開心心，健健康康。

講到保怡嘅愛犬阿水，喺14年10月因為椎間凸出，導致下肢癱瘓，差啲要人道毀滅，但保怡唔肯放棄，喺醫生努力搶救同保怡嘅悉心照料下，阿水總算「吉狗天相」，康復過來。行大運當日，阿水健康又活潑，不時四圍跑，見到佢哋「父慈子孝」，真係戥保怡開心。

今年係狗年，保怡話希望大家最緊要身體健康，尤其係阿水，保怡感言：「到o依家有一次大病，好多小病，佢左邊腋下位置有個水泡，醫生話如果唔係太大嘅話就唔使理，但我近排發現係大咗少少，希望唔好再大喇，佢（阿水）OK嘅，不過隻狗有番咁上下年紀，如果再全身麻醉係會有危險嘅，所以有好多嘢都要好小心處理。」

保怡話阿水經歷咗場大病，令到下半身完全癱瘓，後遺症其實一路都有：「尤其係佢坐低或者瞓低得耐，起身時就會好辛苦，可能會腳震。我要幫佢，除咗用愛（關懷）之外，我會帶佢游水。」保怡指醫生話阿水唔可以做太激烈嘅運動，跑上跑落樓梯都唔適合，所以保怡經常要睇實阿水同制止佢，保怡話：「佢呢個品種係比較好動，細細個已經周圍跳，因為周圍跳搞到椎間盤凸出，佢自己都唔想嘅。雖然佢係一隻殘疾嘅狗，但佢帶俾我嘅係……養狗嘅朋友會知道，你同動物之間嘅溝通係好可愛嘅。你一返到屋企，佢好似等緊你返，好多嘢想同你講，我一返到門口，佢已經同我講好多嘢，通常我估佢係想食零食，有時佢唔鍾意一啲嘢就同我complain。」

自從早幾年傳媒報道過阿水同保怡嘅事之後，阿水知名度大增，保怡話唔少街坊或者西貢區嘅朋友，都識阿水，知道佢生命力好強。講到阿水嘅故事俾到其他狗主一個關於愛嘅正面訊息，保怡話：「大家覺得我隻狗好靚，你睇到表面好開心，但其實有好多嘢你哋唔知，包括佢嘅病痛，大小便你要去執，佢沖完涼之後，屋企每一處地方都係佢啲毛，你要執你要抹。呢樣嘢係好煩嘅，但你一定要take到呢樣嘢先好養狗，唔好立亂去養。」

阿水咁出名，問到有冇人搵阿水做幕前？保怡話：「暫時未有，拍廣告一日半日OK，如果拍戲嘅話，我係一個演員，我唔會捨得比阿水去拍戲，我試過同佢影過相，佢對鏡頭好敏感。」講到新年願望，保怡話同《瑪嘉烈與大衛》嘅導演組咗間公司，希望今年可以拍一啲佢哋想拍嘅網劇同電影。

採訪：魯吉
攝影：仇志德
攝錄：廖達燊

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent