台灣綜藝主持吳宗憲兒子鹿希派（原名︰吳睿軒），上月19日聲言炸市政府，其後被士林地檢署傳喚出庭，庭上鹿希派話好抱歉，又話對事件後悔，最後佢被判罰寫悔過書，又要捐出50萬新台幣（約12.7萬港元）。而吳宗憲與兒子公開道歉時，就曾經話過要兒子退出娛樂圈。（新聞連結： https://bit.ly/2Mrt5W3）

結果呢？鹿希派只係用咗10日（即係8月30日）就復出幫電視台錄影音樂節目，佢受訪時話之後打算會開個人工作室，又話自己冇犯罪。

而鹿希派復出工作陸續有來，噚日佢喺facebook透露，星期日會出席一場live music免費演唱會。晚上直播時，有約5,000人觀看，而吳宗憲在直播中段都有入鏡，佢話如果抽到時間，都會到場支持兒子，又讚個仔有才華，同之前叫個仔退出娛樂圈嘅態度180度反轉。

講到個仔嘅判刑，吳宗憲話兒子應該受鞭刑。講到被罰捐出50萬新台幣，吳宗憲就話係「媒體判案」先會有咁重嘅處罰，佢亦反問網民，點解個仔都認咗錯，點解大家唔俾次機會個仔。而鹿派希亦喺live入面挑釁網民，話星期日嘅活動最多可以容納300人，要控制人數但仍歡迎酸民入場，又向酸民講「用力一點，讓我有感覺」。

精選娛聞，喺晒《娛果》
http://fb.com/appledailyent