日本女星廣末涼子上個月同型佬阿部寬旋風訪港出席電影節,宣傳新片《超時空泡泡女》,已為人母嘅廣末身形弗到漏,同未嫁時一樣kawaii。阿Net最近就見到有網友上載咗阿部寬同廣末亮相人氣節目《CNC》嘅片段,佢哋仲俾鹹濕猩猩主持GOMES玩到殘㖭。
網友catnorefcd5最近以「Chim-panNewsChannel-RyokoHirosue」為題,將《CNC》節目片段放上YouTube。當日患咗重感冒嘅廣末涼子接受猩猩主持GOMES訪問時,即場表演家鄉舞蹈,向來鍾意鹹豬手女嘉賓嘅GOMES,又點會咁輕易放過靚女廣末呢?「鹹猩」GOMES假扮中醫師幫廣末把脈,乘機將頭枕向對方手仔,之後仲大膽向廣末索吻㖭!