57歲嘅毛舜筠係「哥哥」張國榮唯一親口承認深愛過女人，而毛舜筠於95年嫁咗俾大佢14年嘅導演區丁平，仲生咗兩個女令山同亦山，婚姻生活一直美滿，毛姐就簡唔中復出幫下大台拍攝處境劇，之前佢完成咗《八時入席》後，就決定休息一段時間，咁毛姐就利用呢個假期，同家人共享天倫。

今日毛姐就喺微博上載咗大女令山嘅合照，原來係令山嘅畢業相，佢留言話：「不斷的感動、更多的感恩」再貼咗個心心圖案，可想而知毛姐見到大女畢業有幾開心啦！21歲嘅令山令網民大讚係美女星二代，完全遺傳咗媽媽嘅優良基因。

同毛姐份屬老友嘅蔡少芬(Ada)都戥佢開心，留言話：「偉大的母親換來的榮耀！為你感恩、感動！」Ada老公張晉同黃百鳴導演都有留言祝賀。