何傲兒、鄭欣宜、曹敏莉夫婦、周慧敏同小肥等今晚出席莎莎老闆郭少明喺博覽館搞嘅晚宴，着何傲兒低胸晚裝現身，相當搶眼，佢話冇諗過着乜，只係喺屋企摷到條裙又襯到個宴會，而佢話已經黐好晒雙面膠紙，但都怕走光，所以唔敢烏低身，有必要時仲要用披肩「護身」。被問到屋企係咪好多低胸裝？何傲兒就自爆屋企有6個衣櫃，平時出席活動都可以搵到心頭好着嚟見人，但就話自己最多嘅唔係低胸裝。問到佢咁多衫有諗過將拎出嚟賣？何傲兒話：「爸爸都有叫我開鋪頭賣衫，不過自己比較大汗，怕啲衫有味。」記者笑話有汗味可能賣得仲貴，何傲兒話：「咁樣好變態，不過等我整理好先，可能要搵多啲人一齊搞。」

同樣以一襲鮮紅色低胸晚裝現身嘅欣宜，但因為條裙size太大，令到胸前嗰塊布鬆鬆吓，睇見到有啲牙煙，欣宜話：「好危險，做晒安全措施㗎嘞，打晒底黐晒膠紙，不過我好大汗，所以會有危險，本來揀咗件衫係比較casual，但係諗過今日形式係要華麗，上台表演都係同班小朋友一齊，應該OK。」問到演唱會歌衫係咪唔可以咁性感？欣宜笑話：「安全好多！」佢仲搞笑咁即場示範用膊頭跳舞畀大家睇，佢笑話：「咁都郁到㗎！」

精選娛聞，喺晒《娛果》
http://fb.com/appledailyent