世貿第六次部長級會議今年十二月喺香港舉行，籌辦呢個世界級盛事不容有失，大會主席工商及科技局局長曾俊華未來大半年要頻頻出差做準備工夫，同各國貿易部長傾掂份大會宣言初稿，否則年底個大會乜成果都冇就認真失禮啦。

罐頭菠蘿顯示談判成果
鬍鬚曾周圍飛，籌辦大會嘅具體工作就交由佢班手下負責，咁啱佢哋係清一色全女班。工商及科技局常任秘書長俞宗怡會領導一個督導小組，協調各部門工作；而世貿第六次部長級會議統籌辦事處總監王榮珍則負責大會各項安排；工業貿易署助理署長（多邊貿易部）羅淑佩同工業貿易署副署長葉文娟則分擔同各國代表談判嘅責任。記者問鬍鬚曾點解手下咁多女將，佢話女士「叻啲」，咪委以重任囉。
鬍鬚曾噚日特別出席由新聞行政人員協會同工貿署合辦嘅傳媒工作坊，安排官員向記者講解世貿背景資料同談判進展，記者第日報道時較容易掌握情況。
佢話表面睇世貿會議同一般市民冇乜關係，其實各國經貿談判成果最終都會影響民生，佢以一罐罐頭菠蘿為例，喺日本買一公斤罐頭菠蘿要成五十蚊港紙，瑞士則賣三十三蚊，加拿大賣廿二蚊，同一罐菠蘿喺香港買，卻只需十六蚊，呢個就係透過世貿談判自由貿易嘅成果嘞。



傳真︰2623-9278
電郵︰[email protected]