吳克羣與賭王三房千金何超蓮結束4年情，分手原因傳聞多多，又傳偷食又傳大男人，令人O嘴。平安前夕，吳克羣仲喺fb自爆「生平第一次去警局做筆錄」，搞咩呢？原來係佢架車俾人撞。

吳克羣話，事發係本月16號，佢架車泊咗喺停車格內，無端被撞，但要等到23號佢先有時間到警署錄口供。

肇事者個fd今日就喺群組「爆料公社」話，肇事者當日開新車，精神唔集中，就撞咗上一架Benz同BMW，Benz車主開維修費係130萬新台幣(約30萬港幣)，BMW——即係吳克羣嗰架，維修費係4.5萬新台幣(約1萬港幣)。

吳克羣與肇事者聯絡後，好關心對方情況，頻頻問:「處理好了嗎？」、「小孩老婆有沒有事情？」、「有沒有錢可以應付？」，當得知對方有經濟困難後，決定自己俾維修費，並與對方達成共識，希望對方捐出1.5萬新台幣，即約3千港紙俾慈善團體，肇事者大為感激。至於Benz車主最後有冇要求肇事者賠錢呢？個po就冇交代清楚。

呢個聖誕，忽然覺得好暖。