聽《左右大局》之「鋒光大葬」（網民用語抵死到位），黃之鋒大戰張文光，我想起《鹿鼎記》的一幕。
天地會沐王府都是反清義士，本來一加一應該得二，誰知殺敵前先內訌。沐王府認為推翻滿清後，要立朱五太子，永曆天子的後人為正統；天地會則以隆武天子為正統，擁護朱三太子。
兩派的人留住清朝小辮子，卻爭拗日後的帝位由誰個天子的屁股來坐，看得人搖頭嘆息，忍不住想用周星馳的金句回應「爭咩爭，溝埋一齊做瀨尿牛丸啦笨。」
今天「鋒光大葬」也是如此，真普選十劃未有一撇，卻在爭拗應該叫價幾高；就像牌都未砌、骰都未擲，就已經爭論「梗係食自摸爆棚啦！邊有人咁無志氣，話食鋪混一色都話收貨㗎。」
想食大牌，完全無錯，不過想食同食唔食到，係兩個課題，會唔會心雄搞到出銃，又係第三個課題；未開牌已一心只做混一色，理論上容易食出，但牌面咁細，其他玩家當你冇到，最後一樣被人截糊。
民主黨的三軌制，談判策略是「大中小辣，總有一款合你口味。三害取其輕，揀一樣啦。」但人家可以三個都唔揀。
「學民」獨沽一味，只要「公民提名」，好處是目標明確無數走，但提出最高要求，不等於一定可以實現。支聯會嗌了「結束一黨專政」這個「終極口號」十幾年，一黨何時結束了？「學民」提出最高口號「公民提名」，但如何避免自己變成另一個「支聯會」口號？
如果大家都只有「目標」，卻冇「手段」，其實半斤八両，那不如坐低傾下副牌點做好過；那些「分裂泛民」、「出賣香港」的罪名，請收埋帶返屋企，唔好笑死敵人，開心死仇家。