小甜甜爭產官司案情高潮迭起，市民茶餘飯後熱論，由於花名哨牙通嘅陳振聰好多富豪名人客仔，唔少政界人士都幫襯過佢，因此官司順理成章成為近期政界吹水話題，甚至成為立法會議程之一！

質詢自僱人士報稅資料

好多人都驚訝風水師作法、種生基收入原來咁驚人，閒閒哋袋十幾廿億，商界議員林健鋒今個星期三在立法會提出一個口頭質詢，要求稅局提供好似風水師呢類自僱人士嘅報稅資料，同埋一年交幾多錢稅。
林健鋒向八方強調，提出此問題並非八卦，亦不是針對個別人士，只係風水師或者按摩師呢類自僱人士，原來收入係天文數字，好多社會人士都關注佢哋有冇履行公民責任進貢庫房。以一個人收入十億元計，稅款十分可觀，如果佢冇向稅局申報，令庫房有損失，係一個涉及重大公眾利益嘅問題，絕對需要正視。
一般打工仔有糧單、紅簿仔，不容易瞞稅、避稅，上市公司「打工皇帝」人工要在年報披露，亦難逃法眼；不過自僱人士隨時禾稈冚珍珠，林健鋒認為稅局應該盡力追查自僱人士收入來源同金額，嚴打逃稅，「如果明知有人有好大筆收入都冇交稅，冇理由唔追數。」
哨牙通實際搵幾多錢、交幾多稅，外界冇睇過佢本數簿，金額係一個謎。堪輿學家麥玲玲則話其實稅局對風水師盤數睇得好緊，每條收支數目都問得清清楚楚，所以佢報稅絕不敢有遺漏，「我報完稅後，稅局都讚我數目分明。」

風水高人交稅逾200萬

麥師傅稱，一般風水師、堪輿學家收入有數得計，「打開門口做生意，算命收幾多錢，睇風水幾錢呎，賣幾多本運程書，一目了然，稅局攞你本記事簿，對吓有幾多個客人預約，就計到你搵幾多錢，冇得呃人。」佢自爆一年大約交幾十萬稅，行內有高人交稅逾200萬元，「交太少稅，都唔合身份啦！」
風水師咁好搵，交多多稅都濕濕碎啫，麥師傅卻話非也，佢形容呢行係「手作仔」，「自己做就有錢，唔做就冇錢，真正手停口停㗎。」哨牙通係異數，「作法、祈福呢啲嘢冇價講，只要個客認為你值，就多多都捨得畀。」
mailto:[email protected]