繼立法會內4名民主派散人組成「議會前線」，沙田區議會內嘅9個民主派區議員亦都照辦煮碗，成立「沙田區政」，希望團結區內民主派力量，更方便服務居民。

「沙田區政」由沙田區民主派議員和助理組成，包括退出新同盟的丘文俊、陳兆陽等4人，退出民主黨的陳諾恒，傘兵黎梓恩、黃學禮，民主黨丁仕元和工黨葉榮。

出任召集人的丁仕元就話，沙田好多區議員因為唔同原因退出原有政黨，「單頭」區議員往往難以約見政府部門和官員，希望集合區議會內民主派力量「約官都易啲」，亦可合作處理社區問題。佢又強調，自己並非「另起爐灶」，新組織並非政黨，佢唔會因而退出民主黨。