港鐵最近宣傳流動應用程式MTRMobile新推出功能，包括「站內搜尋」及「快捷出站」，卻被炮轟涉嫌抄襲，因Pokeguide app早已推出快捷出站功能，Pokeguide創辦人亦表示去年曾與港鐵高層開會，會上提出過願意開放車卡車門答案數據予港鐵，而港鐵只需要在答案頁面「credit返我哋」便可，不明白為何港鐵要花費千萬推出一模一樣的功能，亦從未通知Pokeguide港鐵正研發相關功能。

即將到美國三藩市的Pokeguide創辦人Brian，臨上機前接訪問表示，Pokeguide與港鐵2015年尾曾簡單見面，到2016年4、5月時第二次見面開會約1、2個小時，簡單介紹他們的新構思。他指當時認為部份技術所需數據要由港鐵自己才能做到，港鐵會上稱讚相關構思「好好呀」並表示有興趣，稱會與不同部門同事研究，事後亦有相約眾人午膳傾談等等，期間港鐵從未表明正研發相關功能。Brian認為，暫時由港鐵公佈的消息和港鐵app的情況分析，新功能與當日會上提及的有7、8成相似，「基本上都係呢啲嘢」。

他強調，其實車門和藍芽均非新技術，港鐵正在構思相關功能亦不足為奇，問題在於港鐵去年會上並無表示正在研發，「會上我哋有建議過其他功能，港鐵有啲都話佢哋做（研發）緊，但bluetooth佢哋就冇話做緊。」他又指，「其實你（港鐵）可以直接同我講你做緊，咁咪算囉」，坦言不覺會如此巧合，港鐵的新功能與當日Pokeguide預備的簡報內容一模一樣。

Pokeguide自2013年開始構思，2015年推出測試版，到2016年正式推出市場。Brian形容，Pokeguide定位是全球性，「目標係全世界」，今次到美國正正是為了推出三藩市版本。他又表示，最令他失望是，港鐵一直未有答允開放數據，例如車門、班次、延誤數據，當日會上亦曾問及港鐵，唯對方未有直接回應，「唔係要你單獨開放畀我，你開放畀全香港IT精英，香港有好多叻人，如果你肯開放數據，我好肯定即刻有唔同公司嘅IT人會一齊做好一啲嘢，係真係幫助到香港巿民，港鐵每日成4百幾萬人次，幫到好多架。」Pokeguid亦在fb提到，當香港支持建造智慧城市支持創科時，「港鐵唔係俾多D機會同startup合作，而要額外花一大筆錢，偷完人idea再自己攞哂嚟做？我真係睇唔透」，並要求港鐵解釋。

港鐵今日回應稱，2013年「我哋都留意到紐約有app提供地鐵快捷出口嘅功能」，其後看到Pokeguide「主打或提供類似嘅功能」，又稱有乘客反映希望加入類似功能到MTR Mobile。站內搜尋方面，港鐵稱2015年已收到建議「可以應用Beacon呢個技術喺我哋嘅app上面，提供導航及提示功能」，又稱坊間一些大型基建、德福廣場亦有應用該技術，「所以我哋都著手研究，最後將呢個技術應用埋喺站內搜尋功能」。有網民隨即質疑港鐵，「個意思係咪，你果（個）idea都係抄紐約地鐵啫，就算係，宜家唔抄都抄左，咁點吖？我仲唔只抄你一間添！」