面對香港電視未獲發牌、亞視不獲續牌，大台疑再次一台獨大，可惜大台小生花旦北望神州，無心留喺大台，出現一、二線「斷層」現象，近年只係力谷黃翠如、張繼聰、陳展鵬、吳若希及蔡思貝等，喺公仔箱睇嚟睇去都係嗰幾個!

早排講明大結局嘅長命劇《愛．回家》，原先決定播到第804集就完結(新聞連結： http://bit.ly/1AgwZpm )，未知係唔係冇咩idea，定係諗唔到用咩劇頂處境劇呢個檔期，大台先忽然叫停，唔准大結局兼「換湯唔換藥」，強插黃翠如、張繼聰、吳業坤、張振朗及何君誠等新人「入屋」。

據知，「馬家」演員仍然有得留底，不過就被迫淡出佢哋個「家」，改由健身中心及海味舖為故事中心，黃翠如同張繼聰仲會喺劇中扮情侶，睇嚟呢套長命劇都仲有機會打破《真情》1128集紀錄，不過，成個馬家都要淡出，又好似冇咩人情味!早前仲揚言搵「Alex」朱慧敏返《愛．回家》救亡收視，但朱慧敏近日飽受情傷，據知，唔止婚禮延期，連酒席都撻訂，佢同未婚夫Eddie仲考慮接受婚前輔導，朱慧敏亦都決定出去行吓散心，講明婚期要無限期押後。

今日有周刊指，Eddie媽曾上門幫個仔求情，報道引述知情者表示，Eddie媽早年就催過佢哋快啲結婚，恨抱孫，男家通知晒親友，若果取消婚禮，男方會好冇面，知個仔都幫唔落，希望朱慧敏同Eddie可以大事化小，話如果同Eddie結咗婚，大家就係一家人，因為朱慧敏嘅親人都唔喺香港，咁就有人照顧佢，朱慧敏當時都忍唔住喊爆，但仍然唔肯讓步，叫Eddie媽先返屋企，需要啲時間冷靜，有傳佢哋已取消一早訂咗喺大埔科學園擺個50圍酒席。