唐唐噚日朝早去柴灣環翠邨協康會早期教育及訓練中心參觀，事前冇通知傳媒，有人通風報信畀記者，好多行家匆匆趕去採訪。
唐唐一行人喺邨內參觀期間，有個師奶好熱情，話要同唐唐影張相，唐唐好易話為，叫師奶一齊影合照，近日追隨唐唐備選嘅華人置業副主席兼非執行董事劉鳴煒，即時幫忙，用師奶部手機為兩人影相。受緋聞困擾嘅唐唐，咁受屋邨師奶歡迎，以前嘅「課外活動」似乎對佢冇乜影響，識得返屋企嘅，唔通就真係好男人？