新世界發展（017）創辦人鄭裕彤個孫鄭志剛（Adrian）出名勤力多搞作，今年升做聯席總經理後，更加落力改善新世界品牌形象，新近整咗本《THEGREENBOOK》（圖）推廣環保，但本報至少收到四本，印呢本嘢本身就唔環保啦。
Adrian整呢本書嘅原意係好，印刷亦好精美，好多綠色，睇見都感受到好環保，但真係唔使印出嚟，即使只係用環保紙印一百幾十本派畀學校同傳媒，已經好唔環保，一個財經版亦唔使收到四本咁多，轉頭都係去咗堆填區！
華華好怕收到上市公司寄嚟嘅內部刊物，呢類刊物通常只係畀機會高層表揚員工、講吓輝煌嘅業務發展，仲會登晒公司活動照片，畀人知道員工喺公司做得幾開心咁，瞬間已去咗垃圾桶。公司如果想搞公關，貓個電子版出嚟就得，無謂嘥錢嘥紙印，堆填區已經好滿好臭了。