「不是冤家不聚頭」呢家嘢，唔一定係大台膠劇嘅老土橋段，現實中真係有機會發生！喺今年2月舉行嘅台維斯盃世界組首圈賽事，加拿大17歲網球小將沙保華洛夫（Denis Shapovalov）對住英國球手艾蒙特期間，落後兩盤下喺第3盤發老脾，由褲袋攞出網球抽擊發洩，就咁省到球證加巴斯（Arnaud Gabas）隻左眼應一應，沙保華洛夫隨即被「DQ」之餘，加巴斯亦一度傳來「險盲」驚魂。

不過，個波又會準到擊中左眼，都係一種緣份，沙保華洛夫日前接受英國《BBC》訪問時就表示：「加巴斯首先發訊息畀我，然後到我回覆。佢係一個超級好人，真係幫助我度過難關，因為佢大可以尖酸刻薄咁對待我，但佢係一個gentleman。」呢位2016年溫布頓少年組冠軍其後亦有親自到訪球證辦公室向加巴斯道歉，並逐漸走出低谷：「當時我放棄之後一個賽事，直情唔想離開被窩，直至母親叫我出外遛狗先至重回日常。呢件事令我變得成熟，喺場上亦變得更冷靜…而我同加巴斯亦以某種奇怪方式成為好朋友。」