買股撐壹傳媒 渾水：問心無愧 世界太令人意想不到
蘋果日報 2020/09/11 00:33
壹傳媒渾水古天后
專欄作家渾水。易仰民攝
警方8月10日搜查蘋果大樓當日，有買入壹傳媒（282）股票、並貼圖放上fb專頁討論的財經KOL渾水表示，現時「尚算平安，係心情有少少忐忑」，「反正要來始終都要來，我問心無愧，我只係驚煩到我日常生活同埋嚇親我屋企人。」他向《蘋果》稱，大概了解事件內容，表示自己「行得正企得正」，沒有觸犯到相關法律。雖然自己有參與股份炒作，但股票出入記錄都有在社交媒體公佈，「對得住所有人。」他亦申報自己沒有設立WhatsApp群組。 他稱，早在Facebook表明該投資是不理性、並列名投資涉及風險，「冇涉及任何警方覺得我會犯嘅罪」，「但依家世界實在太令人意想不到，我都唔知用咩心情應對。」
渾水於蘋果大樓被警方搜查當日，大手買入壹傳媒股票。
渾水當日於FB出帖表示於0.078元買入122萬股壹傳媒，其提供買入截圖，總代價9.5萬元。最後他沽出部份壹傳媒股份，表示獲利會以獎學金形式捐助中大學生。他表示幾個月前曾向中大學生派了獎學金近10萬元，作為中大校友，希望每年可以每年做這一件事。渾水坦言，尚保留一手（1萬股）壹傳媒，「做你哋嘅永遠股東。」
薯伯伯百萬股已提實股 「賺二千萬定係賺七十萬，都係浮雲」
另一位於8月10日為支持壹傳媒而買入股份的薯伯伯於fb表示，「唔知點解咁多人發壹傳媒（282）嘅新聞畀我睇。不過點都唔關我事，因為我一早提咗貨，攞咗實體股票，有入未出，長揸唔放，就當呢張實體股票係情書，當佢係選票。無論人哋賺二千萬，定係賺七十萬，對我都係浮雲㗎咋。」
薯伯伯當日買入一球（100萬股）壹傳媒股份，最高峰時賬面曾賺到180萬左右，他曾在FB自爆，經紀問他要否把部份股票套現獲利「賺回本金」，他說不，因為喜歡持百萬股的意頭，早就預算有朝一日會打回原形，甚或更差。
古天后：事件對香港金融業有負面影響
證監會持牌人古天后表示，「做咗金融圈咁多年，冇見過呢啲嘢發生。」她表示如有人觸犯上市條例，一般會由證監會先作出調查，一旦經調查發現涉刑事成份，才會轉介警方商業罪安調查科或廉政公署，「今次係搵毒品調查科，我都睇到有啲一頭霧水。」她認為今次事件對香港金融業多少會有負面影響，「邊個管邊樣，應該跟規矩做。如果係涉上市條例，應交返去港交所、或者證監會處理先。」
她表示，壹傳媒當日成交大，波動大，「唔會係咁容易操控到呢隻嘢囉。你睇個換手率，咁多人去參與，換手率咁高，冇可能一小撮人控制到，市場有市場力量，如果你市場力量咁大，你點以一敵八，葉問咩？」她表示，一隻股票要易於操縱，最起碼要貨源歸邊，「當日好多炒鬼衝入去買賣，你話可以點輕易操縱，我諗唔到囉。」
壹傳媒主席黎智英早前接受《彭博》訪問時告誡投資者，不要買入壹傳媒的股票，因為該公司的基本面無法支持當時的升勢，「收入很少的人只想表達自己的憤怒，並表示對我們公司的支持......每個人都買了一點，那就變得很多了，並推高了股價，我告訴人們『不要這樣做，不要這樣做，因為你會蝕錢的』。」
-----------------------------
【全球樓行】 Dream House零距離
屬於香港人的移民攻略
-----------------------------
上車必讀天書 「九成按」入市懶人包
點擊即睇《按揭必讀手冊》電子書
-----------------------------
《蘋果》英文版免費試睇：了解更多