一個係JYP事務所王牌，另一個亦係SM事務所王牌，本來missA主將秀智同男團EXO成員伯賢大纜都扯唔埋，點解會扯上關係呢？原來佢哋最近靜靜雞合作新曲《Dream》，仲會於本月7號公開。噚日事務所率先公開預告照，睇見佢哋對望個畫面好warm好sweet，唔知會唔會見好反應，將來keep住跨公司合作，以情侶檔姿態拍住上搵食呢？

據知秀智同伯賢今次合作，係因為被音樂製作人睇中佢哋有無限潛力，而一向係競爭對手嘅JYP同SM亦覺得可以畀佢哋試試。《Dream》係一首以爵士同Neo-Soul為基準嘅R&B曲風嘅歌曲，歌詞內容講述陷入愛情嘅男女之間嘅故事。