今個聖誕，民主派特別開心，因為從未試過咁團結，可以以小擊大，否決咗政府嘅政改方案，當然值得慶祝。
今次事件嘅大功臣，煲呔同肥龍前上司陳方安生冇蒲頭，大家以為佢又去咗英國，原來並非如此，佢阿姐由英返港後，一直冇外出，呢兩日重喺屋企開聖誕派對，享天倫之樂。
眾人媽打李麗娟係手袋黨嘅忠實成員，話就話個黨只傾家事，打吓衞生麻雀，但係每逢聖誕佢都親自去陳太屋企送吓聖誕禮物畀陳太幾個孫仔。
而陳太呢，就成個大家姐咁，一定買件靚靚嘅衫畀媽打，交換禮物，政務官嘅傳統又真係非常密切，大家簡直情如姊妹。
陳太喺政改方案被否決後冇再講嘢，可能係佢「見步行步」策略，暫時不宜出招，先觀察煲呔有乜反應，反正煲呔已爆咗佢吩咐肥龍傳話，傳話人重係氣谷谷，無謂撩佢住。

繼續扮演在野軍師

陳太想點北京最想知，煲呔都講明目前唔諗告老歸田，即係唔會讓個位畀阿太喺○七年表演，咁即係陳太繼續扮演在野軍師，適當時指指點點。識陳太嘅政壇老鬼分析陳太志不在當特首，只係想喺香港民主史上留名，如果係咁，目的已達到。
「喺適當時候講適當說話」，有人笑陳四萬過去錯過咗多次當特區元首嘅良機，以致益咗曾某人，但係今次佢上街踏出民主第一步，又確實高招，搞到煲呔同肥龍孖寶兄弟唔知點接，結果兵敗如山倒。香港人究竟想要乜？呢個肯定係○六年第一個課題，值得大家做多啲調查研究。


爆料熱線：29290000、27860099
報料傳真：26239278
報料電郵：[email protected]