踢咗兩輪後四隊同分兼同得失球嘅非國盃D組,周三終於喺最後一輪,揭曉咗其中一個可躋身八強嘅球隊,就係奪冠大熱之一嘅科特迪瓦。憑中場麥斯格拉度(中)喺三十五分鐘一腳世界波,「大象軍團」以1:0小勝曾經喺外圍賽力壓佢哋取得首名嘅喀麥隆,加上另一場分組賽馬里同幾內亞又踢成1:1,因此喀麥隆篤定包尾出局,科特迪瓦就首名入八強。佢哋八強會鬥阿爾及利亞,場波下周日先打,即係話大軍入面兩位曼城兵耶耶托尼同韋菲特邦尼(右),都冇得喺周六返英超大戰車路士。不過車路士都唔好得幾多,迪亞高哥斯達因為喺周二英聯盃涉嫌蓄意踩利物浦後衞安利簡恩隻腳,足總已正式起訴呢位茅柴,可能被罰停賽三場,如果落實,呢場大戰就唔使預佢。
至於馬里同幾內亞同得三分,得失球又係三球,根據非國盃賽例,將要由籌委會喺非洲當地時間周四下晝四點進行抽籤,決定邊隊可以攞到次名出線資格。