今個馬季踏入尾聲，3個未贏夠16場頭馬最低要求嘅練馬師中，以目前有14Win嘅Michael鄭俊偉成功上岸機會最樂觀。

今日（25日）沙田頭場，鄭俊偉獲雷神莫雷拉助拳，由他策尺寸馬「幸運坊」出戰5班1400米，亦預告下期谷戰（28日），鄭俊偉全晚只出一隻「智有心得」，同樣獲得雷神垂青，可見雷神樂意為中小型馬房打拼。

講番今日第8場3班1600米，鄭俊偉共有「嬴風雲」、「金剛仔」同「好力煌」上陣，較特別「嬴風雲」上場配李寶利只輸少少給「美麗寶寶」屈居亞軍，李寶利坦言非常渴望續騎「嬴風雲」，但帥權最終落喺韋達手上，李寶利甚至呢場冇馬騎坐冷板。

翻查資料，「嬴風雲」同主馬「御風雲」雷神騎過6次最叻季軍，反而今季初首次配韋達即爆11倍Win開齋，韋達同馬主似乎好有緣。

至於「嬴風雲」前仗由韋達策騎，結果後追不及得亞軍，僅僅輸畀「快樂寶貝」頸位，韋達當日有冇必要留到咁後值得商榷，但既然幕後信任他，今場人馬重逢，韋達唔想未來帥權被李寶利搶走嘅話，一定搏甩髀。