由Eric、李瑞鎮及尹鈞相出演嘅韓國收費台tvN王牌節目《一日三餐》噚晚播出最新一集，李鍾碩為力撐好兄弟尹鈞相早前已秘密錄影，噚日就播出以李鍾碩做嘉賓嘅一集。

李鍾碩今次為咗撐好兄弟先現身綜藝節目，佢平日甚少出演，估唔到今次卻被好兄弟整蠱，話說尹鈞相就同節目組夾計，喺李鍾碩抵達前就放置咗隱藏攝影鏡頭，之後李瑞鎮同Eric就同李鍾碩講尹鈞相可能要晏啲先嚟到參與拍攝，李鍾碩即時大感驚慌，話自己因為尹鈞相先來。

而Eric就抵死扮唔識李鍾碩，李鍾碩即謙虛同Eric佢哋介紹自己，之後Eric同李瑞鎮就喺李鍾碩面前大講尹鈞相壞話，搞到李鍾碩唔知點算，尷尬地話：「我以為尹鈞相受到好多關愛。」而此時李鍾碩就發現尹鈞相喺出面，即時興奮地衝向對方前，大呼：「我差啲喊咗出嚟。」可愛舉動甚為搞笑。

另外，噚晚一集有李鍾碩助陣，即時令到收視升至9.810%，最高瞬間達12.9%。