要講到NBA今年最威,就係一定勇士喇,啱啱破咗常規賽73勝紀錄。風頭可以同勇士相比嘅,就只有退役嘅拜恩(KobeBryant)。「大帝」勒邦占士(LeBronJames)?真係冇人理。
喺騎士所在地克里夫蘭,就有一間公司睇唔過眼,所以踩吓勇士抬吓占士,出咗件印有「23>73」嘅tee,應該就係話占士大過勇士咁解啦(當然你可以理解為,23號嘅占士會過檔73勝嘅勇士嘅...)。下面仲要寫住「最偉大嘅球隊係喺6月決定」,擺明就係話勇士嘅常規賽紀錄同哭泣聲一樣都係絕無意義,總冠軍先重要。
間公司仲要喺介紹件衫嗰到寫「今年個個都講西岸隊波,73勝好叻叻。但係喺俄亥俄州,我哋都有我哋自己嘅冧把:23!克里夫蘭準備贏冠軍!」到時真係贏冠軍就威威,輸咗就畀人抽到乾。
體蘋果facebook專頁↓↓↓
http://fb.com/appledailysports